ក្លឹប​ម៉ាឡេស៊ី​ជូនពរ ធារី ចន្ថាប៊ីន មុន​ជំនួប​រវាង កម្ពុជា​ទល់នឹង​ជម្រើស​ជាតិ​ខ្លួន

ក្លឹបបាល់ទាត់ Terengganu FC នៅប្រទេសម៉ាឡេស៊ី បានបង្ហោះនៅលើទំព័របណ្ដាញសង្គមហ្វេសប៊ុកផ្លូវការរបស់ខ្លួន ជាមួយរូបថតពីរសន្លឹក ដើម្បីជាការជូបពរ ចំពោះខ្សែបម្រើ ធារី ចន្ថាប៊ីន ដែលជាសមាជិកក្រុមជម្រើសជាតិកម្ពុជា មុនការប្រកួតទល់នឹងក្រុមជម្រើសជាតិម៉ាឡេស៊ី។

ការបង្ហោះរបស់ Terengganu 

បើតាមការបង្ហោះនោះបានឲ្យដឹងថា សមាជិករបស់ក្លឹប​ Terengganu គឺ ធារី ត្រូវបានកោះហៅឲ្យចូលរួមក្រុមជម្រើសជាតិកម្ពុជា ក្រោមការ​ដឹកនាំរបស់លោក Keisuke Honda ដែលទើបតែត្រូវបានតែងតាំងជាអ្នកចាត់ការទូទៅថ្មីក្រុមជម្រើសជាតិ។

Honda ដឹកនាំកូនក្រុម ហ្វឹកហាត់ថ្ងៃដំបូង នៅពហុកីឡដ្ឋានជាតិ កាលពីថ្ងៃទី៤កញ្ញា

សូមជម្រាបថា ខ្សែបម្រើខ្មែរ កាត់បារាំងខាងលើ គឺជាសមាជិកដ៏សំខាន់មួយរូបនៅតំបន់បម្រើការពារនាពេលបច្ចុប្បន្ន សម្រាប់​ក្លឹប Terengganu ទាំងការប្រកួតលីគ និង Cup រដូវកាលនេះ នៅម៉ាឡេស៊ី បន្ទាប់ពីផ្លាស់ពីក្លឹបអគ្គិសនីកម្ពុជា។ ហើយ ធារី បានមកដល់កម្ពុជា កាលពីថ្ងៃទី៣ ខែកញ្ញា តាមការកោះហៅរបស់លោក Honda ។

ក្រុមជម្រើសជាតិកម្ពុជា នឹងប្រកួតមិត្តភាពទល់នឹង ម៉ាឡេស៊ី នៅពហុកីឡដ្ឋានជាតិ ថ្ងៃទី១០ ខែកញ្ញា វេលាម៉ោង ៦:៣០ នាទីល្ងាច៕

អត្ថបទទាក់ទង ធារី ចន្ថាប៊ីន អន្ទះសា​ចង់​ជួប​ក្រុម​ការងារ​របស់​ Honda ក្រោយ​ជាប់​ជម្រើស​ជាតិ

អត្ថបទ៖ លាភ.